మెగాస్టార్ చిరంజీవి క‌థానాయ‌కుడిగా కె.రాఘ‌వేంద్ర‌రావు ద‌ర్శ‌క‌త్వంలో అల్లు అర‌వింద్ స‌మ‌ర్ప‌కులుగా, డా.కె.వెంక‌టేశ్వ‌ర‌రావు నిర్మించిన `రౌడీ అల్లుడు` ఓ సెన్సేష‌న్‌. బాక్సాఫీస్ వ‌ద్ద బంప‌ర్ హిట్ కొట్టిన చిత్ర‌మిది. శోభన, దివ్య భారతి క‌థానాయికలుగా న‌టించారు. గ్యాంగ్ లీడ‌ర్ త‌ర్వాత ఆ రేంజులో బ్లాక్‌బ‌స్ట‌ర్ అయిన చిత్ర‌మిది. ఈ సినిమా 18 అక్టోబ‌ర్ 1991లో రిలీజైంది. ఇప్ప‌టికి 25 సంవ‌త్స‌రాలు పూర్త‌యింది. ఇన్నేళ్లుగా ఈ చిత్రం ఇప్ప‌టికీ అభిమానుల గుండెల్లో మ‌ర‌పురాని చిత్రంగా నిలిచిపోయిందంటే అందుకు కార‌ణాలెన్నో.

‘కొండవీటి దొంగ’, ‘జగదేకవీరుడు అతిలోకసుందరి’, ‘కొదమసింహం’, ‘రాజా విక్రమార్క’, ‘స్టూవర్టుపురం పోలీస్ స్టేషన్’, ‘గ్యాంగ్ లీడర్’ .. ఇవ‌న్నీ ఓ రాబిన్ హుడ్, ఓ పోలీస్ ఆఫీసర్, ఒక కౌబాయ్ తరహా కథలతో తెర‌కెక్కిన చిత్రాలు. వాట‌న్నిటికీ భిన్నంగా మెగాస్టార్ చిరంజీవి న‌టించిన పూర్తి స్థాయి కామెడీ యాక్ష‌న్ ఎంటర్‌టైన‌ర్‌ ‘రౌడీ అల్లుడు’.

ఒకే పోలిక‌తో ఏడుగురు ఉంటారంటారు. ఈ సినిమాలో ఒకే పోలిక‌తో ఉన్న ఇద్ద‌రు ఆడిన నాట‌కం ఏంట‌న్న‌ది ఆస‌క్తిక‌రం. కోట్లాది రూపాయ‌ల ఆస్తికి వార‌సుడు అయిన ఓ బిజినెస్ మ్యాగ్నెట్ (క‌ల్యాణ్‌)ని మోసం చేసి ఆస్తి కొట్టేయాల‌ని అదే పోలిక‌తో ఉన్న ఆటో జానీని తెచ్చి కుట్ర చేస్తే అస‌లు నిజం తెలుసుకున్న ఆటోజానీ ఆ దుర్మార్గుల పాలిట య‌మ‌కింక‌రుడిగా ఎలా మారాడ‌న్న‌దే – రౌడీ అల్లుడు క‌థాంశం. మోస‌గాళ్ల‌కు మోస‌గాడిగా జానీ వేసిన స్కెచ్ ఏంట‌న్నది ర‌క్తి క‌ట్టించేలా తెర‌కెక్కించారు కె.రాఘ‌వేంద్ర‌రావు. మెగాస్టార్ ద్విపాత్రాభిన‌యం ఆల్ టైమ్ ట్రెండ్ సెట్టింగ్ పెర్ఫామెన్స్ తెలుగు ప్రేక్ష‌కుల్ని స‌మ్మోహ‌నంలోకి దించేసిందంటే అతిశ‌యోక్తి కాదు.

చిరంజీవి ద్విపాత్రాభినయం చేసిన పది సినిమాల్లో రౌడీ అల్లుడు ఒక‌టి. మిగిలిన తొమ్మిదింటిలో చిరంజీవి నటన ఒక ఎత్తు అయితే ఇందులో చిరంజీవి నటన మరో ఎత్తు. విద్యావంతుడు, పెద్దింటి కుటుంబానికి చెందిన వ్యాపారవేత్త పాత్రలో కల్యాణ్ హుందాగా క‌నిపిస్తే, ‘ఇదర్ కా మాల్ ఉదర్, ఉదర్ కా మాల్ ఇదర్’ చేరుస్తూ చిన్నచిన్న మోసాలు చేస్తూ, ఆటో నడుపుకుంటూ తన జీవనాన్ని సాగించే ఆటో జానీ పాత్రలో చిరు జీవించారు. రెండు పాత్రల్లోని భిన్న పార్స్యాలను తన ఆంగికం, వాచికంతో అద‌ర‌హో అన్న రీతిలో మెప్పించారు. “వీడెవడండీ బాబూ ..” అంటూ కోట,`బొంబైలో అంతే, బొంబైలో అంత` అంటూ అల్లు నవ్వుల్తో ముంచెత్తుతూ భయంకరమైన విలనీతో అద్బుత‌మైన పెర్ఫామెన్స్ చేశారు. `భగవంతుడు అంతే బాబు అప్పుడప్పుడూ `కమాల్` చేస్తూ ఉంటాడు` అంటూ వచ్చి రాని హిందీలో అల్లు మాట్లాడటం. ‘ఆల్ ది బెస్ట్ ఆఫ్ లకింగ్స్’, ‘నో టచింగ్స్’, ‘సిట్టింగ్స్’, ‘స్టాన్డింగ్స్’ అంటూ వచ్చీ రాని ఇంగ్లీష్ లో జానీ సంభాషణలు సినిమాకు బలమైన బలం !! ‘బాక్సులు బద్దలైపోతాయి’ అనే డైలాగ్ స్టేట్ మొత్తాన్ని ఒక ఊపు ఊపింది.

మెగాస్టార్ ‘స్టేట్ రౌడీ’, ‘గ్యాంగ్ లీడర్’ చిత్రాలకు సంగీతం అందించిన బప్పీలహరి ఈ సినిమాకు కూడా చ‌క్క‌ని సంగీతం అందించారు. ‘చిలుకా క్షేమమా’ అంటూ మొదటి పాటగా వచ్చే డ్యూయెట్ సూపర్ హిట్ సాంగ్, జానీ పాత్ర ఇంట్రో కాగానే డిస్కోశాంతితో వచ్చే ‘అమలాపురం బుల్లోడా .. నీ బొంబై చూడాలా’ అనే సాంగ్ మాస్ పాటల్లో నేటికీ, ఎప్పటికైనా గుర్తుండిపోయే పాట. ఆ పాటలో చిరంజీవి డ్యాన్సులోని స్పీడుని ఈ తరం నటులు ఇప్పుడున్న టెక్నాలజీని వాడుకుని కూడా చేయలేరు. ‘కోరి కోరి కాలుతోంది’ అంటూ సాగే తొలిరాత్రి పాట రొమాంటిక్ గా ఉంటుంది. ప్రేమా గీమా తస్సాదియ్యా పక్కన పెట్టు, లవ్లీ మై హీరో, తద్దినక తప్పదిక పాటల్లో చిరంజీవి, దివ్యభారతి డ్యాన్సులు కొత్తగా ఉంటాయి. ‘లవ్లీ మై హీరో ..’ పాట మధ్యలో వచ్చే ఒక సుదీర్ఘమైన మ్యూజిక్ బిట్ కి చిరంజీవి దివ్యభారతి చేసే డ్యాన్సు ప్రత్యేకంగా ఉంటుంది.

ఆ మ్యాన‌రిజ‌మ్స్ చిరంజీవికి త‌ప్ప ఎవ‌రికీ సాధ్యం కాదు! – డా.కె.వెంక‌టేశ్వ‌ర‌రావు

మెగాస్టార్ చిరంజీవి హీరోగా న‌టించిన `రౌడీ అల్లుడు` చిత్రానికి డా.కె.వెంక‌టేశ్వ‌ర‌రావు నిర్మాత‌. చిరంజీవితో `న్యాయం కోసం`, `చ‌క్ర‌వ‌ర్తి` వంటి విజ‌య‌వంత‌మైన చిత్రాల్ని నిర్మించిన త‌ర్వాత హ్యాట్రిక్ చిత్రంగా `రౌడీ అల్లుడు` చిత్రాన్ని నిర్మించారు. 25 వ‌సంతాలు పూర్తి చేసుకున్న సంద‌ర్భంగా ఆ సినిమా విశేషాలు డా.వెంక‌టేశ్వ‌ర‌రావు ఇలా చెప్పుకొచ్చారు.

*నేను నిర్మాత‌న‌వ్వ‌డానికి అల్లు అర‌వింద్ గారి ప్రోత్సాహం, ప్రోద్భ‌ల‌మే కార‌ణం. ఆయ‌నే చిరంజీవి గారితో సినిమాలు చేసే అవ‌కాశం క‌ల్పించారు. నిర్మాత‌గా న‌న్ను నిల‌బెట్టారు. ఓవైపు డాక్ట‌రుగా ప్రాక్టీసు, బిజీ లైఫ్‌, మ‌రోవైపు సినిమాల నిర్మాణం రెండు బాధ్య‌త‌ల్ని స‌వ్యంగా నిర్వ‌ర్తించ‌గ‌లిగానంటే అర‌వింద్ ఇచ్చిన స‌హ‌కారంతోనే. పేరుకు నేను నిర్మాత‌నే అయినా బావ‌గారే (అర‌వింద్‌) అన్నీ ద‌గ్గ‌రుండి చూసుకునేవారు. ప్రొడ‌క్ష‌న్ వ్య‌వ‌హారాలు చ‌క్క‌బెట్టేవారు. మెగాస్టార్ చిరంజీవి, అల్లు అర‌వింద్ .. నాకు ఇద్ద‌రూ రెండు క‌ళ్లు.

*చిరంజీవి గారితో `న్యాయం కోసం` తొలి సినిమా. ఆ త‌ర్వాత `చ‌క్ర‌వ‌ర్తి` మూవీ నిర్మించాను. మూడో సినిమాగా `రౌడీ అల్లుడు` చేశాను. ఆ త‌ర్వాత మెగాస్టార్‌తోనే `అన్న‌య్య` సినిమా తీశాను. నేను నిర్మించిన సినిమాల‌న్నీ 100రోజులు ఆడిన‌వే. వాటిలో అన్న‌య్య సినిమా 175రోజులు ఆడింది. రీసెంటుగా బ‌న్ని క‌థానాయ‌కుడిగా నిర్మించిన `రేసుగుర్రం` చిత్రం 100రోజులు పూర్తి చేసుకుని చిర‌స్మ‌ర‌ణీయ‌మైన విజ‌యాన్ని అందించింది.

*రౌడీ అల్లుడు 18 అక్టోబ‌ర్, 1991లో రిలీజైంది. మెగాస్టార్ చిరంజీవి క‌థానాయ‌కుడిగా ద‌ర్శ‌కేంద్రుడు కె.రాఘ‌వేంద్ర‌రావు ద‌ర్శ‌క‌త్వంలో సాయిరామ్ ఆర్ట్స్ బ్యాన‌ర్‌లో ఈ చిత్రాన్ని నిర్మించాను. తొలి రెండు చిత్రాల్ని వ‌సంత ఆర్ట్స్ బ్యాన‌ర్‌లో నిర్మించాను. రౌడీ అల్లుడు సినిమాకి క‌ర్త, క‌ర్మ‌, క్రియ కె.రాఘ‌వేంద్ర‌రావు, అల్లు అర‌వింద్‌, చిరంజీవి త్ర‌యం. ఆ ముగ్గురే ప్రాజెక్టును ముందుకు న‌డిపించారు. చిరంజీవి డ‌బుల్ రోల్‌లో ఓ సినిమా చేద్దామ‌ని రాఘ‌వేంద్ర‌రావు గారు ముందుకొచ్చారు. సీనియ‌ర్ ర‌చ‌యిత స‌త్యానంద్, అల్లు అర‌వింద్, చిరంజీవి అంతా క‌లిసి క‌థ‌పై చ‌ర్చించారు. అనంత‌రం ప్రొడ‌క్ష‌న్ ప‌నులు ప్రారంభించాం. అలా రౌడీ అల్లుడు సెట్స్‌కెళ్లింది. రౌడీ అల్లుడు త‌ర్వాత మ‌ళ్లీ త్రిపుల్ రోల్‌తో `ముగ్గురు మొన‌గాళ్లు` చిత్రం చేశారు మెగాస్టార్‌.

*నేను ఓ వైపు డాక్ట‌రుగా బిజీగా ఉంటూనే, అప్పుడ‌ప్పుడు షూటింగుల‌కు వెళ్లేవాడిని. ఆ క్ర‌మంలోనే న‌న్ను నిర్మాత‌గా ఎంక‌రేజ్ చేస్తూ.. చిరంజీవి గారు, అర‌వింద్ గారు సినిమాల నిర్మాణం వైపు పురికొల్పారు. మ‌ద్రాస్‌లో పాతిక సంవ‌త్స‌రాలు పైగానే ఉన్నాను. హైద‌రాబాద్‌లో 15 సంవ‌త్స‌రాలుగా ఉంటున్నా. 2001 ఆగ‌స్టులో హైద‌రాబాద్‌లో అడుగుపెట్టాను. అయితే మ‌ద్రాసులో వ‌డ‌ప‌ల్లి- మ‌సీదు వీధిలో (మురుగ‌న్ వీధి ప‌క్క‌న‌) డాక్ట‌ర్ వృత్తిని కొన‌సాగించేవాడిని. నిత్యం 35-40 మంది వ‌ర‌కూ క్లినిక్‌కి వ‌చ్చేవారు. జూనియ‌ర్ ఆర్టిస్టులకు అర్థ రూపాయికే వైద్యం అందించాను ఆ రోజుల్లో. మావ‌య్య (కీ.శే.అల్లు రామ‌లింగ‌య్య‌) గారి ప్రోద్భ‌లంతోనే అదంతా. 1990 నుంచి రూ.5 ఫీజుతో వైద్యం చేశాను. ఇప్ప‌టికీ చెన్న‌య్ నుంచి పేషెంట్స్ వ‌స్తే న‌న్ను క‌ల‌వ‌కుండా వెళ్ల‌రు. అలాంటి అభిమానం, అదృష్టం నాకు ద‌క్క‌డం దైవ‌సంక‌ల్పం అనే అనుకుంటాను.

*రౌడీ అల్లుడు చిత్రంలో మెగాస్టార్ ద్విపాత్రాభిన‌యం హైలైట్‌. అందులో ఆటోజానీ క్యారెక్ట‌ర్ .. మెగాస్టార్ పండించిన కామెడీ, మ్యాన‌రిజ‌మ్స్‌ని అంత తేలిగ్గా మార్చిపోలేం. చిరంజీవి ..ద‌ర్శ‌కుడు కె.రాఘ‌వేంద్ర‌రావుతో ప్ర‌తిదీ చ‌ర్చించి చేసేవారు. అయితే ఆ బాడీ లాంగ్వేజ్, మ్యాన‌రిజ‌మ్స్‌ మాత్రం చిరంజీవి గారి సొంత‌ ప్ర‌య‌త్న‌మే. నూటికి నూరు పాళ్లు ఆయ‌న సృజించిన‌దే. అంతేకాదు అల్లు రామ‌లింగ‌య్య గారు `బొంబాయిలో ఇంతే .. బొంబాయిలో ఇంతే` అంటూ న‌వ్వులు పూయించిన ఆ డైలాగ్ ని అలా చెప్ప‌మ‌ని సూచించింది కూడా చిరంజీవి గారే. ఆ జ‌ర్ధా కిళ్లీ వేసుకునే స్ట‌యిల్‌.. ఆయ‌న‌కు ఆయ‌నే ఎన్నో డెవ‌ల‌ప్ చేసుకుని చేసేవారు. ద‌ర్శ‌కుడిగా కె.రాఘ‌వేంద్ర‌రావు ప‌నిత‌నం, ర‌చ‌యిత‌గా ఎన్నో అద్భుత చిత్రాల‌కు స్టోరి, డైలాగ్స్ అందించిన స‌త్యానంద్ గారి అనుభ‌వం ఆ సినిమాకి పెద్ద ప్ల‌స్ అయ్యాయి. ఇక సినిమా మ్యూజిక‌ల్ హిట్‌గా నిలిచేంద‌కు బ‌ప్పీల హ‌రి సంగీతం క‌లిసొచ్చింది. చిలుకా క్షేమ‌మా .. కులుకా కుశ‌ల‌మా పాట ఇప్ప‌టికీ ఎవ‌ర్‌గ్రీన్‌. క‌థానాయిక‌లు శోభ‌న, దివ్య భార‌తి ఇద్ద‌రికీ ఆ సినిమాతో మంచి పేరొచ్చింది.

*ప్ర‌స్తుతం `ఖైదీ నంబ‌ర్ 150` షూటింగులో మెగాస్టార్ బిజీ. నేను ఆన్‌లొకేష‌న్‌కి వెళ్లాను. లారెన్స్ మాష్ట‌ర్ సార‌థ్యంలో సాంగ్ షూట్ చేస్తున్నారు. ఒక్క‌ టేక్‌కే ఓకే చెప్పేయ‌డం… చ‌ప్ప‌ట్లు కొట్ట‌డం చూశాను. మెగాస్టార్ బాడీలో టింజ్ ఇప్ప‌టికీ మార‌లేదు. అదే ఛ‌రిష్మా. అదే హుషారు. ఇప్పటికీ న‌వ‌యువ‌కుడిలా స్టెప్పులేయ‌డం చూస్తుంటే ముచ్చ‌టేస్తోంది. నేటిత‌రం హీరోలు ఆయ‌న్ని చూసి ఇన్‌స్ప‌యిర్ అవ్వాల్సిందే. ఆ రేంజులో డ్యాన్సులేస్తున్నారు. మెగాస్టార్ లుక్ ఇప్ప‌టికీ గ్యాంగ్ లీడ‌ర్‌ని త‌ల‌పిస్తోంది.

*బ‌న్ని హీరోగా `రేసుగుర్రం` బ్లాక్‌బ‌స్ట‌ర్ హిట్ సాధించింది. మీతో సినిమా చేస్తాను పెద‌నాన్న అని అడిగాడు చ‌ర‌ణ్‌. త‌న‌తో ఓ సినిమా చేయాలి. మీ బ్యాన‌ర్‌లో అన్ని సినిమాలు హిట్లే. నాతో సినిమా చేయ‌వా డాక్ట‌రు మామా? అని అడిగాడు శిరీష్‌. త‌న‌తోనూ సినిమా చేస్తాను. ..

అంటూ చిట్‌చాట్‌ ముగించారు.

యంగ్‌ రెబల్‌ స్టార్‌ ప్రభాస్‌, అనుష్క, తమన్నా,రాణా, రమ్యకృష్ణ, నాజర్‌ ప్రధాన తారాగణంగా, సూపర్ సక్సెస్ఫుల్ డైరెక్టర్ ఎస్‌.ఎస్‌.రాజమౌళి దర్శకత్వంలో, దర్శకేంద్రుడు కె.రాఘవేంద్రరావు సమర్పణలో ఆర్కా మీడియా వర్క్స్‌ బ్యానర్‌పై శోభు యార్లగడ్డ, ప్రసాద్‌ దేవినేని లు నిర్మాతలుగా రూపొందుతోన్న ప్రతిష్టాత్మకమైన చిత్రం ‘బాహుబలి2’. – ‘ది కన్‌క్లూజన్‌’. ఈ  సినిమా చిత్రీకరణ తుది దశకు చేరుకుంది. ఈ సినిమా విశేషాలను తెలియజేయడానికి చిత్ర యూనిట్‌ శుక్రవారం హైదరాబాద్‌లో మీడియా ముందుకు వచ్చింది. ఈ కార్యక్రమంలో ఎస్‌.ఎస్‌.రాజమౌళి, ప్రభాస్‌, రాణా, నిర్మాతలు శోభు యార్లగడ్డ, ప్రసాద్‌ దేవినేని పాల్గొన్నారు. ఈ సందర్భంగా….

సినిమా దాదాపు పూర్తయ్యింది

నిర్మాతల్లో ఒకరైన శోభు యార్లగడ్డ మాట్లాడుతూ – ”షూటింగ్‌ ప్రకారం చూస్తే సినిమాలో ముఖ్య ఎపిసోడ్స్‌ అన్నీ పూర్తయ్యాయి. అక్టోబర్‌, నవంబర్‌, డిసెంబర్‌ లో సినిమా చిత్రీకరణ అంతా పూర్తి చేసేస్తాం. కొన్ని సీన్స్‌, సాంగ్స్‌ చిత్రీకరించాల్సి ఉంది. ఏప్రిల్‌ 28న బాహుబలి2 విడుదల చేయబోతున్నాం. వచ్చే ఏడాది, అంటే జనవరిలో సినిమా ట్రైలర్‌ విడుదలయ్యే అవకాశాలున్నాయి” అన్నారు.

నా పుట్టినరోజున ఫస్ట్‌ లుక్‌

ప్రభాస్‌ మాట్లాడుతూ – ”బాహుబలి కామిక్‌ బుక్స్‌ విడుదల చేస్తున్నాం. అక్టోబర్‌ 1న ఆనిమేటెడ్ సిరీస్ టీజర్ విడుదల చేస్తాం. నా ఫ్యాన్స్‌, అందరూ ఎదురుచూస్తున్న ఫస్ట్‌ లుక్‌ను అక్టోబర్‌ 22న నా పుట్టినరోజుకు ఒక రోజు ముందు విడుదల చేస్తున్నాం. మధ్యలో గ్యాప్ దొరికినప్పుడు సినిమా చేద్దాం అనుకున్నా. కానీ బాహుబలి లాంటి ఒక మహా సముద్రం మధ్యలో చిన్న చిన్న నదులను వదలటం కరెక్ట్ కాదేమో అనిపించింది. అందుకే రెస్ట్ తీసుకున్నా. తరువాత సుజిత్ తో, రాధాకృష్ణ తో సినిమాలు ఓకే అయ్యాయి  ” అన్నారు.

బాహుబలి ఒక మహా వృక్షం

రాణా మాట్లాడుతూ – ”యూరి లో జరిగిన సైనిక శిబిరం పై దాడి ని ఖండిస్తూ, మన దేశ రక్షణ కోసం ప్రాణాలను అర్పిస్తున్న వీర జవాన్లకు వందనం.  ఇప్పుడు నేనొక సినిమాల అభిమానిగా మాట్లాడుతున్నాను. నేను హైదరాబాద్‌లో చాలా ఇంగ్లిష్‌ సినిమాలు చూసేవాడిని. ఇండియానా జోన్స్‌ లాంటి వార్‌ సినిమాలంటే నాకు చాలా ఇష్టం. అలాంటి సినిమాలకు సంబంధించిన బుక్స్‌ ఎక్కువగా చదివేవాడిని. ఇండియన్‌ సినిమా ఎప్పటికైనా ఇలా ఉంటుందా? అని అనుకునేవాడిని. బాహుబలి సినిమా ప్రారంభంలో నేను రాజమౌళిగారిని కలిసినప్పుడు ఒక మ్యాప్‌ చూపించారు. మహిష్మతి అనే రాజ్యం, ఆ రాజు, అందులోని ప్రజలు, వారు వాడే వస్తువులు వంటివన్నీ నాకు సవివరంగా చెప్పారు. మహిష్మతి రాజ్యం అనేది రాజమౌళిగారు క్రియేట్‌ చేసిన ప్రపంచం, మహా వృక్షం. ఆ మహా వృక్షంలో చాలా కొమ్మలున్నాయి. అందులో ఒక కొమ్మ బాహుబలి సినిమా. ఇది కాకుండా టెలివిజన్‌ సీరీస్‌, కామిక్‌ బుక్స్‌, మెర్చండైజింగ్‌, వర్చువల్‌ రియాలిటీ  వంటి ఎన్నో  అంశాలు రాబోతున్నాయి. ఫైనెస్ట్‌ వార్‌ ఫిల్మ్‌ ఇన్‌ ద కంట్రీని తెరకెక్కించడానికి వాళ్లు ఎంత కష్టపడ్డారో తెలిసిందే. చాలా సినిమాలకి ప్రమోషన్‌ తాలూక టీ షర్ట్‌ లు వంటివి చూస్తుంటాం. యామజాన్‌ ప్రైమ్‌ నుంచి మా టీజర్‌ను అక్టోబర్‌ 1న విడుదల చేయనున్నాం. వరల్డ్‌ క్లాస్‌ యానిమేషన్‌ చూస్తున్నట్టు అనిపిస్తుంది” అన్నారు.

వర్చువల్ రియాలిటీ ఎక్స్ పీరియెన్స్ తో `బాహుబలి2`

ఎస్‌.ఎస్‌.రాజమౌళి మాట్లాడుతూ – ”బాహుబలి టీమ్‌ కి అక్టోబర్‌ చాలా ఎగ్జైటింగ్ నెల. ఎందుకంటే బాహుబలికి సంబంధించిన రకరకాల విషయాలు అక్టోబర్‌లోనే విడుదలవుతాయి. బాహుబలి యానిమేటెడ్‌ సిరీస్‌ అమెజాన్‌ ప్రైమ్‌లో రానుంది. దానికి సంబంధించిన టీజర్‌ అక్టోబర్‌ 1న విడుదలవుతుంది. అక్టోబర్‌ 5న ప్రభాస్‌ ఫ్యాన్స్‌ కి గుడ్‌ న్యూస్‌ చెప్తున్నాం. అదేంటనేది ఇప్పుడే చెప్పం. ఆ న్యూస్‌ తన అభిమానులకే కాదు మొత్తం సౌత్‌ ఇండియాకే గర్వకారణంగా ఉంటుంది. అలాంటి న్యూస్‌ అక్టోబర్‌ 5న రిలీజ్‌ కానుంది. ఇక బాహుబలిని ఒక మహావృక్షం గా  తీసుకుంటే టీవీ సీరీస్‌, కామిక్స్‌, బుక్స్‌, గేమ్స్‌ అన్నీ హయ్యస్ట్‌ బడ్జెట్‌తో తీస్తున్నాం. బాహుబలితో వర్చువల్‌ రియాలిటీ ఎక్స్‌ పీరియెన్స్‌ అనే దాన్ని పరిచయం చేస్తున్నాం. ఇలాంటి ఎక్స్‌పీరియెన్స్‌తో అందరూ ఎగ్జయిట్‌ అవుతారు. మాహిష్మతి సామ్రాజ్యాన్ని 360 డిగ్రీస్‌లో ఎక్స్‌ పీరియన్స్‌ చేయగలిగే ఎక్స్పీరియన్స్ ఇది. ఈ రోజు మధ్యాహ్నం నేను తొలి టెస్ట్‌ చూశా. యూఎస్‌కి వెళ్లి వర్చువల్‌ రియాలిటీ టెక్నాలజీని గురించి తెలుసుకున్నా. రకరకాల కంపెనీల్లో వీడియోలు చూశా. నేను అక్కడ చూసిన క్వాలిటీ కన్నా, మేం తీసిన టెస్ట్‌ షార్ట్‌ చాలా మంచి క్వాలిటీతో ఉంది.

 2D తెరమీద బొమ్మ చూస్తున్నట్టు కాకుండా మాహిష్మతి ప్రపంచంలోకి వెళ్లి , అక్కడ జరగుతున్న కథని అక్కడివారితో కలిసి చూస్తున్న అనుభూతిని కలుగుతుంది. ఉదాహరణ చెప్పాలంటే గూగుల్‌ కార్డ్‌ బోర్డ్‌ లో ఫోన్‌ పెట్టుకుని 360 డిగ్రీస్ లో చూస్తే వర్చ్యువల్ రియాలిటీ కనిపిస్తుంది. మరి కొంచెం మెరుగైన క్వాలిటీ కావాలంటే శామ్‌సంగ్‌ గేర్‌ వియర్‌ని పెట్టుకుని వర్చువల్‌ ప్రపంచాన్ని చూడొచ్చు. ఏ ఫోన్‌ ఉంటే ఆ ఫోన్ కి పనికొచ్చే VR గ్లాస్సెస్ ని వాడి చూడొచ్చు.వీటి ధర రూ.100 నుంచి రూ.3000 ఉండొచ్చు. 

అత్యుత్తమ వర్చువల్‌ రియాలిటీ ఎక్స్పీరియన్స్ కావాలంటే మాత్రం రూ.2లక్షల ఖర్చుతో ఆక్యులస్‌ రిఫ్ట్‌ గానీ, వైవ్‌గానీ  దొరుకుతాయి. మేం చేసే బాహుబలి VR  ఎక్స్‌ పీరియన్స్‌ ఆ గ్లాసెస్‌ కోసం చేస్తున్నాం. ఇవి అందరికీ అందుబాటు లో లేవు కాబట్టి 200, 300 థియేటర్లలో వాటిని స్టాల్స్‌ పెట్టి మేమే ఇస్తాం. దానితో ఆడియెన్స్‌ ఈ ఎక్స్‌ పీరియన్స్‌ ని పొందొచ్చు. ప్రపంచం మొత్తం మీద ఇలాంటిది తొలిసారి బాహుబలి సినిమాలకే జరుగుతుంది. దీని కోసం మేం రూ.25 కోట్ల బడ్జెట్‌ను కేటాయిస్తున్నాం. బాహుబలి థియేటర్లలో విడుదల కావడానికి నెల రోజుల ముందుగానే వర్చువల్‌ రియాలిటీ ఎక్స్‌ పీరియన్స్‌ను విడుదల చేస్తాం. దాంతో పాటు మేకింగ్‌ వీడియోస్‌ని వర్చువల్‌ రియాలిటీలో చేస్తున్నాం. డైరక్ట్‌గా కావాలంటే ఫోన్‌లో ప్యాన్‌ చేసుకుని, గూగుల్‌ కార్డ్‌ బోర్డ్‌లోనూ చూడొచ్చు. మేకింగ్‌ వీడియోలను కూడా హై క్వాలిటీ  VR లో  చేస్తున్నాం. వర్చువల్‌ రియాలిటీలో రూపొందించిన తొలి మేకింగ్‌ వీడియో ప్రభాస్‌ పుట్టినరోజుకి విడుదల చేయనున్నాం” అన్నారు.

తర్వాత మీడియా అడిగి ప్రశ్నలకు రాజమౌళి సమాధానమిచ్చారు….

అక్టోర్‌ 5న ప్రభాస్‌కు సంబంధించిన న్యూస్‌ ఏంటి? ప్రభాస్‌కు ఏమైనా ప్రఖ్యాత అవార్డు  వచ్చిందా….?

– అవార్డులకు సంబంధించిన న్యూస్‌ కాదండీ. మాకు ఆ న్యూస్‌ వచ్చినప్పుడు ఎంత థ్రిల్ ఫీల్ అయ్యామో, మీరు అవ్వాలి. 5 న అందరికీ తెలుస్తుంది.

బాహుబలి 2 హైలైట్స్‌ చెప్పండి?

– ఇంతకు ముందు నేను చేసిన సినిమాలకు సంబంధించిన విషయాలను ముందుగానే ఓ పద్ధతి ప్రకారం రవీల్‌ చేసుకుంటూ వచ్చాను. అయితే బాహుబలికి సంబంధించి ఎలాంటి విషయాలు చెప్పకూడదు, సినిమాలోనే చూడాలనేది నా అభిప్రాయం.

బాహుబలి2లో తమన్నా మీద సాంగ్స్‌ ఉంటాయా?

– సెకండాఫ్‌లో తమన్నా ఉంటుంది. కానీ ఆమె మీద పాటలు లేవు. అనుష్క ఇందులో హీరోయిన్‌. అనుష్క మీదనే పాటలు ఉంటాయి. 

యుద్ధ సన్నివేశాల చిత్రీకరణ పూర్తయ్యిందా ?

– సినిమా లో కీలకమైన క్లైమాక్స్‌ అయిపోయింది. గ్రాఫిక్స్‌ విషయంలో, మనుషుల విషయంలో ఏ ఇబ్బందులు లేకుండా పూర్తి చేయగలిగాం. రెండున్నర నెలలు సమయం పట్టింది. ఎడిటింగ్‌ చేసి గ్రాఫిక్స్‌ చేశాం.

షూటింగ్‌లో ఇంకా ఏం చేయాల్సి ఉన్నాయి?

– రెండు పాటలు, చిన్న ప్యాచ్‌ వర్క్‌, ఒక చిన్న యాక్షన్‌ సీక్వెన్స్‌ ఉంది.

ప్రభాస్‌, రాణా లను ఎప్పుడు విడిచి పెడతారు?

– డిసెంబర్‌ నెలలో రెండు వారాల్లో వారికి సంబంధించిన షూటింగ్‌ పూర్తవుతుంది. దాంతో ప్రభాస్‌,రాణా యే  కాదు, అందరూ ఆర్టిస్ట్‌లు రిలీజ్‌ అవుతారు.

బాహుబలి పార్ట్‌ 3 ఉంటుందా?

– బాహుబలి అనే మహావృక్షం నుంచి చాలా సినిమాలు వస్తాయి. సినిమా అనేది కొమ్మ మాత్రమే. బాహుబలి పార్ట్‌ 3 అనేది ఆన్‌ ద కార్డ్స్‌. అది ఎలా వస్తుందో ఇప్పుడే చెప్పలేను. 

వర్చువల్‌ రియాలిటీ ఎక్స్‌పీరియెన్స్‌తో ఇంటర్నేషనల్‌ మార్కెట్‌ను టార్గెట్‌ చేస్తున్నారా?

– నేషనల్‌ ఆడియన్స్‌నే నేను టార్గెట్‌ చేశాను. వర్చువల్‌ రియాలిటీకి సంబంధించి ఎ.ఎం.డి వాళ్లతో కోలాబోరేట్ అయ్యాం. వాళ్లు నాణ్యతతో కూడిన లెటెస్ట్‌ కెమెరాలు,రిలేటెడ్‌ టెక్నాలజీ, దానికి సంబంధించిన స్టిచింగ్‌, హై క్వాలిటీ 360 డిగ్రీ ఇమేజ్‌ని తీసుకురావడానికి హెల్ప్‌ చేస్తున్నారు. లాస్‌ ఏంజెల్స్‌ లో గ్రాఫిక్స్‌ కంపెనీల్లో దానికి సంబంధించిన సీజీ వర్క్‌ జరుగుతోంది.

వర్చువల్‌ రియాలిటీని చేయడానికి ఇన్స్‌ పిరేషన్‌ ఎక్కడిది? ఈ టెక్నాలజీ కేవలం వార్‌ సీక్వెన్స్‌ కేనా?

– ఇది చాలా ఫ్లాట్‌ఫార్మ్స్‌ కి రీచ్‌ అవుతుందని అనుకుంటున్నాం. సెట్‌ ఇన్‌ ద వార్‌. బట్‌ వార్‌ మాత్రమే ఉండదు. సినిమా మొత్తానికి ఉంటుంది.

బాహుబలి కి టైమ్‌ ఫ్రేమ్‌ ఏమన్నా పెట్టుకున్నారా?

 ఫరెవర్‌. నాకు బాహుబలిని వదలాలని లేదు. వెస్ట్‌ లో ఫ్రాంచైసిస్‌ అనేది ఇంతే. స్టార్ వార్స్ వంటి సినిమాలు చుడండి. ఎవరైతే క్రియేట్‌ చేశారో వాళ్లు పోయిన తర్వాత కూడా అది కంటిన్యూ అవుతూనే ఉంది. ఈ సినిమా కోసం ఆర్టిస్టులు పెట్టిన హార్డ్‌ వర్క్‌ సినిమా అయ్యాక ఆగిపోవాలని లేదు. కంటిన్యూ కావాలని ఉంది.